11/03/2008  BalkanWeb

Njohja e pavarësisë së Kosovës përçan vendet e Konferencës Islamike. Në datat 13 dhe 14 mars në Dakar do të zhvillohet samiti i 11-të i kësaj organizate dhe çështja e Kosovës pritet të shtrohet për diskutim. Dje e përditshmja turke “Zaman”, njoftoi se Turqia do të përpiqet që të përfshijë në dokumentin përfundimtar të konferencës që duhet të votohet nga 57 anëtarët, një nen lidhur me njohjen e pavarësisë së Kosovës. Por agjencia e lajmeve APA bëri të ditur dje nga Dakari, se ky propozim nuk është pranuar, madje kanë protestuar kundër tij vende të tilla si Azerbajxhani, Egjipti, Sudani dhe Indonezia. Përfaqësuesit e këtyre vendeve që do të marrin pjesë në samitin e 11-të të Konferencës Islamike, do të kërkojnë që në dokumentin përfundimtar të “solidarizohen me popullin e Kosovës”. Pavarësisht nga këto kundërshti, e përditshmja turke “Zaman” bën të ditur se përfaqësuesi turk do ta ngrejë këtë çështje në këtë samit, i cili ka si temë kryesore “Islami në shekullin e XXI”.
Berisha nuk do të marrë pjesë në samitin e 11-të të Konferencës Islamike, bëjnë të ditur njoftimet nga kabineti i kryeministrit. Të njëjtat burime saktësojnë se në këtë konferencë, në vend të Berishës do të jetë ministri i Jashtëm, Lulzim Basha. Arsyeja që Berisha anulon Dakarin, është se më 12 mars, pra të mërkurën, organizohet një aktivitet i rëndësishëm i Partive Popullore Europiane në Bruksel, ku do të jetë i pranishëm dhe kryeministri dhe mësohet se atje ai do të lobojë për Kosovën. Ndërkohë, këtë lobing për të njëjtën çështje duhet ta bëjë ministri Basha, por që duket se nuk do ta ketë të lehtë.
Pas njohjes së pavarësisë së Kosovës, pati një deklaratë për shtyp të zëdhënësit të Konferencës Islamike, i cili ndër të tjera, në emër të vendeve anëtare të kësaj konference, mbështeste pavarësinë e Kosovës. Deri tani nga 57 anëtare, vetëm katër shtete e kanë njohur pavarësinë e Kosovës, e këto janë Turqia, Malajzia, Afganistani dhe vetë vendi pritës i samitit të 11 të vendeve islamike, Senegali. Burimet diplomatike theksojnë se Arabia Saudite dhe Emiratet e Bashkuara Arabe pritet ta njohin shumë shpejt Kosovën, por një gjë të tillë nuk e ka bërë ende Kuvajti, vend i cili u vizitua nga një delegacion i madh i deputetëve shqiptarë, si dhe kryeministri i këtij vendi vizitoi për dy ditë me radhë Shqipërinë. Në samitin e një viti më parë, përfaqësuesja e Shqipërisë në Konferencën Islamike ishte zëvendësministrja Harxhi, e cila pas mbërritjes në Tiranë bëri të ditur se kishte bërë lobing në Islamabad, kryeqyteti i Pakistanit, për çështjen e Kosovës.

12/03/2008 Balkanweb

Me ftesë te Sekretarit të Përgjithshëm të Konferencës Islamike, Ekeludin Ihsanoglu, Republika e Kosovës do të marrë pjesë në Konferencën Islamike që mbahet më 13 dhe 14 mars në Dakar të Senegalit.
Ministri për Arsim, Shkencë dhe Teknologji, Enver Hoxhaj dhe Bekim Çollaku, këshilltar i lartë i Kryeministrit Thaçi, do të marrin pjesë në konferencë të Ministrave të Punëve të Jashtme të vendeve islamike.
“ Qëllimi kryesor i pjesëmarrjes në samitin e Konferencës Islamike është që të shpjegojmë në mënyrë shumë të qartë se, problemi i Kosovës i pazgjidhur për një shekull është evropian dhe në asnjë mënyrë, nuk mund të krahasohet me ndonjë vend në Afrikë apo Azi”, ka deklaruar Hoxhaj para nisjes për në Dakar.