11.02.2008      balkanweb.com

Zbulohen ne Vlore dy gropa me pesticide

Dy gropa të mëdha të çuditshme gjenden në rrethinat e qytetit të Vlorës. Alarmi për dy gropat është dhënë nga banorët e zonës së Kaninës, një fshat disa kilometra larg Vlorës. Dyshimi kryesor është se në këto dy gropa të mëdha, janë hedhur lëndë helmuese, apo pesticide, ndërkohë që zona më parë ka qenë në përdorim të një firme austriake që kërkonte naftë. Por pas përpjekjeve të dështura për të gjetur naftë, austriakët janë larguar, ndërkohë që në të njëjtin vend, janë hapur dy gropat gjigande. Sapo kalon zonën ku janë vendosur antenat e telefonisë celulare por edhe të operatorëve të tjerë, pak metra më tutje gjendet një tabelë, e cila tregon për një zonë të ndaluar, së bashku me një portë hyrëse e parashikuar për tu hapur dhe mbyllur vetëm për njerëzit dhe automjetete e përzgjedhura. Ndërsa aktualisht, porta hapet dhe mbyllet nga era. Pak më tutje gjendet një godinë e vogële menjëherë pas saj zbulohen dy gropat enigmatike.
Rreziku
Gropa më e madhe është gati 10 metra e gjatë dhe 6 metra e gjerë, ndërsa një tjetër gropë më e vogël është 6 metra e gjatë dhe 4 metra e gjerë. Gropa më e madhe është e veshur rreth e rrotull me një material plastik të zi dhe shumë rezistent. Ndërkohë, banori që na shoqëron thotë se rreth saj, banorët e zonës kanë marrë fuçi të cilat janë plastike me ngjyrë të zezë dhe të ambalazhuara. Nuk dihet se çfarë kanë pasur brenda këto fuçi, por ato janë lënë aty nga firma në mënyrë krejt të shkujdesur. madje një pjesë e tyre janë rreth gropës së veshur me plasmas të zi.
Gjurmët
Ndërkohë, edhe pse ka rënë shi, në këtë zonë, rreth gropave, shihen qartazi gjurmë makinash të mëdha, që në syrin e lirë të gazetarit, duket të jenë gjurmë maunesh, apo kamionësh të mëdhenj. Dhe duke qenë se janë të freskëta, rruga më e fundit që mund të jetë bërë me këto makina drejt gropave, duhet të jetë e këtyre 10 ditëve të fundit. Banorët e zonës thonë se nuk kanë parë asgjë, por nuk përjashtojnë mundësinë që këto makina të kenë kaluar edhe natën drejt pikës skajore të antenave. Poshtë plasmasit, nuk mund të shihet se çfarë ka për shkak të shiut që ka rënë në zonë, ndërkohë që nën plasmas, poshtë një shtrese dheu dhe shiu, nuk dihet se çfarë është fshehur apo çfarë thellësie kanë të dy gropat.
Fuçitë
Edhe pse banorët nuk e dinë se çfarë kanë brenda fuçitë, banorët e zonës i kanë marrë dhe i kanë bërë pronë të tyre. Jo vetëm kaq, por i kanë futur ato në shfrytëzim për lëndë konsumi, si ujë, bërje vere, rakije etj. Fuçitë, të cilat përmbanin rreth 200 litra material janë shpërndarë në gfjithë zonën. Askush prej tyre nuk ka parë nëse këto kanë qenë me lëndë të rrezikshme apo jo, por ndërkohë nuk kanë bërë asnjë përpjekje për të verifikuar apo për të bërë analizën e tyre. Thjesht i kanë kthyer në mjete utilitare. 

 Enrik Mehmeti